Somos unha asociación de carácter educativo-cultural con vocación de servizo publico e polo tanto moi apegada ao territorio. Apostamos por favorecer o emprego da lingua galega nos media, entendida como vehículo de comunicación: a canle idónea para transmitir as nosas historias. Aproveitamos o impacto que teñen os medios de comunicación local no territorio

Temos o compromiso de colaborar na preservación do noso patrimonio e na recuperación de todas aquelas tradicións locais en perigo. Facilitamos canles de accesibilidade a todas as persoas, con independencia da súa condición socioeconómica ou diversidade de todo tipo. É un espazo onde as ideas han ser expresadas libremente, un foro onde información e coñecemento circula, que fomenta o pensamento crítico e diverso.

O noso principal obxectivo é desenvolver proxectos dinamizadores do territorio que garantan o dereito á educación en comunicación e ó dereito á expresión comunicativa da cidadanía. Buscamos inculcar hábitos de investigación e activar a conciencia crítica.

Buscamos facilitar ferramentas que axuden na dinamización da nosa cultura audiovisual e dixital; impulsar o empoderamento tecnolóxico, o que permitirá que as nosas historias teñan un oco nos media e na rede; valorizar os coñecementos locais, así como facilitar a interacción interxeracional e a transferencia de coñecemento entre as persoas maiores e as máis novas; reconstruír novos relatos dende novos soportes en torno á cultura local, e por extensión á cultura galega; impulsar proxectos dende e para o rural.

A nosa asociación ten un carácter horizontal e aberto e busca empregar metodoloxías participativas en accións e procesos. Desenvolvemos accións que visibilicen as minorías ou maiorías minorizadas. Empregamos metodoloxías feministas na loita contra calquera tipo de discriminación por causa de sexo, xénero ou orientación sexual. Contribuímos coa superación da brecha dixital rural, vindicando a ruralidade e as historias rurais e a súa importancia na zona.

Empregamos na medida do posible medios e linguaxes de programación, bibliotecas e aplicacións libres, apostando polo opensource coma filosofía. Ademais temos o compromiso de abrir tanto procesos coma contidos, que se publicarán baixo licencias libres segundo corresponda, favorecendo o acceso ao coñecemento.